আচলতে কি হ'বলৈ গৈ আছে সমাজ ব্যৱস্থা? সচাঁকৈয়ে শেষ হ'বলৈ ধৰিছে নেকি মানৱতা? ক'ৰবাত যদি সন্তানক পিতৃয়ে ধৰ্ষণ কৰিছে ক'ৰবাত আকৌ কেৱল এটা মাত্ৰ iPhoneৰ বাবে সন্তানক বিক্ৰী কৰিছে পিতৃ-মাতৃয়ে।
কিছু সংখ্যক দম্পতীয়ে তেওঁলোকৰ আৰ্থিক স্থিতি উন্নত কৰিবলৈ নিজৰ কেঁচুৱা বিক্ৰী কৰাৰ ঘটনা আমি প্ৰায় শুনিবলৈ বা পঢ়িবলৈ পাওঁ । কিন্তু আজিৰ এই ঘটনাই অচম্ভিত কৰি তুলিছে সকলোকে।
সামাজিক মাধ্যমত ৰীল বনায় famous হোৱাৰ ইচ্ছা সকলোৰে থাকে । কিন্তু সেই বুলি ৰীল বনোৱাৰ নামত সন্তানক বিক্ৰী কৰি iPhone লোৱা ঘটনাটো সচাঁকৈয়ে আচৰিত ।
আধুনিক সমাজত প্ৰায় সকলোৱে সামাজিক মাধ্যমত ৰীল বনায় নিজৰ সময় পাৰ কৰিবলৈ ধৰিছে। তেওঁলোকে ৰাজহুৱাভাৱে নৃত্য কৰি, কেতিয়াবা কোনোৱে উপদ্ৰৱ সৃষ্টি কৰি, ক্ষতিকাৰক ষ্টাণ্ট কৰি নিজৰ ভিডিঅ’ ভাইৰেল কৰিবলৈ বিভিন্ন কৌশল অৱলম্বন কৰা দেখিবলৈ পোৱা যায়। অনলাইন যোগে টকা উপাৰ্জন কৰাৰ ই সহজ উপায় ।
পশ্চিম বংগৰ এহাল দম্পতীয়ে তেওঁলোকৰ কেঁচুৱাটোক এটা আইফোন (iPhone) কিনিবলৈ বিক্ৰী কৰিছে যাতে তেওঁলোকে ৰীল বনাব পাৰে। এই ঘটনাটো সংঘটিত হৈছে ৰাজ্যখনৰ উত্তৰ ২৪ পৰগণা জিলাত । ইতিমধ্যে আৰক্ষীয়ে কেঁচুৱাটোৰ জন্মদাত্ৰী মাক-দেউতাকক সাথী আৰু জয়দেৱ বুলি চিনাক্ত কৰিছে। আনহাতে, শিশুটো কিনা মহিলাগৰাকীক প্ৰিয়ংকা ঘোষ বুলি চিনাক্ত কৰা হৈছে।
এই ঘটনাটো দম্পতীহালৰ চুবুৰীয়াসকলে ৮ মাহৰ শিশুটো সন্ধানহীন হৈ থকা লক্ষ্য কৰি আৰক্ষী থানাত এক প্ৰতিবেদন দাখিল কৰাৰ পিছত সমগ্ৰ ঘটনা পোহৰলৈ আহে। ওচৰ চুবুৰীয়াই মন কৰে যে যিয়ে এসাজঁ খাদ্যৰ বাবে সংগ্ৰাম কৰিব লগা হয়, তেওঁলোকে হঠাতে কেনেকৈ এটা আইফোন কিনিছে। তেওঁলোকে কেঁচুৱাটো নিৰুদ্দেশ হোৱা আৰু দম্পতীহালৰ এটা দামী ফোনৰ মালিক হোৱাৰ মাজত এটা সম্পৰ্ক আছে বুলি সন্দেহ কৰিছিল।
তাৰ পিছত আৰক্ষীয়ে তদন্ত কৰিবলৈ আহোতে সাথীয়ে তেওঁলোকক কৈছিল যে তেওঁলোকে নিজৰ ৮মহীয়া পুত্ৰক বিক্ৰী কৰিছিল যাতে তেওঁলোকে ৰাজ্যৰ বিভিন্ন প্ৰান্তলৈ ভ্ৰমণ কৰিব পাৰে আৰু ৰীল বনাব পাৰে। বাতৰি অনুসৰি, জয়দেৱে অতীতত তেওঁলোকৰ সাত বছৰীয়া জীয়েককো বিক্ৰী কৰাৰ চেষ্টা কৰিছিল।
এনে কাৰ্য ইনষ্টাগ্ৰামত জনপ্ৰিয় হোৱাৰ উন্মাদনা আৰু বৃহৎ পৰিমাণৰ ধন উপাৰ্জন কৰাটো বাস্তৱত পৰিণত কৰা নে মানুহৰ বাবে দৰিদ্ৰতাক পৰাস্ত কৰাৰ এক নতুন উপায় হৈ পৰিছে সেইয়া এক প্ৰশ্ন।
- Log in to post comments
