বৰপেটা সত্ৰত মাধৱদেৱৰ কীৰ্তন মহোৎসৱ পালন, হৰিনাম ধ্বনিৰে মুখৰিত সত্ৰনগৰী বৰপেটা....

বৰপেটা সত্ৰত মাধৱদেৱৰ কীৰ্তন মহোৎসৱ পালন 
হৰিনাম ধ্বনিৰে মুখৰিত সত্ৰনগৰী বৰপেটা
উলহ-মালহেৰে পালন গুৰুজনাৰ তিৰোভাৱ তিথি 
তিথি উপলক্ষে বৰপেটা সত্ৰত ভকত-বৈষ্ণৱৰ সমাগম
সত্ৰত সেৱা ল’বলৈ পুৱাৰে পৰাই ভক্তৰ ভিৰ

জগতগুৰু শ্ৰীমন্ত শংকৰদেৱৰ প্ৰিয় শিষ্য মহাপুৰুষ মাধৱদেৱ স্থাপিত ঐতিহ্যমণ্ডিত বৰপেটা সত্ৰত আজি মহাসমাৰোহেৰে পালন কৰা হয় মাধৱদেৱ গুৰুজনাৰ তিৰোভাৱ তিথি মহোৎসৱ৷ বৰপেটা সত্ৰত মাধৱদেৱৰ তিৰোভাৱ তিথি কীৰ্তন মহোৎসৱ হিচাপে পালন কৰা হয়৷ কীৰ্তন মহোৎসৱ  উপলক্ষে বৰপেটা সত্ৰত আজি অগনন ভক্ত বৈষ্ণৱৰ সমাগম হয়৷ গুৰুজনাৰ প্ৰতি সেৱা জনোৱাৰ বাবে পুৱাৰে পৰাই সত্ৰত ভীৰ কৰে ভক্তসকলে৷ পুৱাৰ পৰাই আজি সত্ৰত অনুষ্ঠিত হয় নাম প্ৰসংগ৷ কৃষ্ণ নাম ধ্বনিৰ ৰসেৰে মুখৰিত হৈ পৰে সত্ৰনগৰী বৰপেটা৷ 

আজি পুৱাৰ পৰাই বৰপেটা সত্ৰৰ ডেকাসত্ৰীয়া গৌতম পাঠকৰ লগতে সত্ৰৰ ভকতসকলে কীৰ্তনঘৰত অনুষ্ঠিত প্ৰসংগত ভাগ লয়৷ বৰপেটা সত্ৰত পালন কৰা মহাপুৰুষ মাধৱদেৱৰ কীৰ্তন মহোৎসৱ উপলক্ষে চৈধ্য প্ৰংসগৰ উপৰিও নিত্য নৈমিত্তিক প্ৰসংগৰ সংযোজন কৰা হয়৷ মাধৱদেৱৰ তিৰোভাৱ তিথি মহোৎসৱ বৰপেটা সত্ৰত দহদিনীয়া কাৰ্যসূচীৰে পালন কৰা হৈছে৷  বিয়লি সত্ৰত ঘোষা কীৰ্তন, ব্যাস কীৰ্তন পৰিবেশন কৰাৰ লগতে  দক্ষিণহাটীৰ বাপুসকলে এক আকৰ্ষনীয় সাংস্কৃতিক শোভাযাত্ৰাৰে সত্ৰত কৰভাৰ প্ৰদান কৰিব।