বলীউডৰ প্ৰখ্যাত অভিনেতা ঋষি কাপুৰৰ পুত্ৰ ৰণবীৰ কাপুৰক ED ৰ চমন জাৰি। এটা গেমিং এপৰ সৈতে জড়িত গোচৰৰ সন্দৰ্ভত শুকুৰবাৰে প্ৰৱৰ্তন সঞ্চালকালয়ৰ সন্মুখত হাজিৰ হ'বলৈ কোৱা হৈছে ৰণবীৰ কাপুৰক।
ৰাষ্ট্ৰীয় সংবাদ মাধ্যমত প্ৰকাশিত অনুসৰি, বলীউডৰ অভিনেতা ৰণবীৰ কাপুৰে এপটোৰ প্ৰচাৰৰ বাবে কেইবাটাও বিজ্ঞাপনত অভিনয় কৰিছে। কিন্তু তাৰ বিনিময়ত অভিনেতাজনে লাভ কৰা মাননী অপৰাধজনিত উপাৰ্জনৰ পৰা আহিছিল বুলি তদন্তকাৰী সংস্থাটোৱে দাবী কৰিছে। এই সন্দৰ্ভতে অভিনেতা ৰণবীৰ কাপুৰক প্ৰৱৰ্তন সঞ্চালকালয়ত হাজিৰ হোৱাৰ বাবে নিৰ্দেশনা জাৰি কৰা হৈছে।
উল্লেখ্য যে, বিতৰ্কটো আৰম্ভ হৈছিল মহাদেৱ অনলাইন বুক নামৰ এপ নামৰ এটা অবৈধ বেটিং ৱেবছাইটক কেন্দ্ৰ কৰি। তদন্তকাৰী সংস্থাটোৱে উত্থাপন কৰা অভিযোগ অনুসৰি, ৱেবচাইটো নতুন ব্যৱহাৰকাৰীৰ নাম ভৰ্তি কৰা, ব্যৱহাৰকাৰীৰ আইডি সৃষ্টি কৰা আৰু বেনামি বেংক একাউণ্টৰ স্তৰযুক্ত ৱেবৰ জৰিয়তে ধন ৰপ্তানি কৰাৰ বাবে অনলাইন প্লেটফৰ্মৰ ব্যৱস্থা কৰাৰ দৰে অপৰাধমূলক কাৰ্যৰ সৈতে জড়িত।
অনলাইন গেমিংৰ ক্ষেত্ৰত চৰকাৰে নিৰ্ধাৰণ কৰা নতুন নিয়ম অনুসৰি বেটিং আৰু বাজি লগোৱাৰ লগত জড়িত সকলোধৰণৰ গেমিং এপ ভাৰতত নিষিদ্ধ কৰা হৈছে। বিশেষ সূত্ৰৰ পৰা লাভ কৰা তথ্য অনুসৰি এই সন্দৰ্ভত প্ৰায় এক ডজন অভিনেতা-অভিনেত্ৰী তদন্তকাৰী সংস্থাটোৰ নজৰত আছে। অতিশীঘ্ৰেই এইসকল অভিনেতা-অভিনেত্ৰীকো প্ৰৱৰ্তন সঞ্চালকালয়ত হাজিৰ হোৱাৰ বাবে নিৰ্দেশনা দিয়া হ'ব বুলিও সূত্ৰই জানিবলে দিয়ে।
উল্লেখ্য যে, যোৱা মাহত, বিত্তীয় জালিয়াতিৰ তদন্ত কৰা তদন্ত সংস্থাটোৱে অনলাইন বেটিং গোচৰৰ সন্দৰ্ভত ৪১৭ কোটি টকাৰ সম্পত্তি জব্দ কৰিছিল।
- Log in to post comments
