ৰে'লত মহিলা যাত্ৰীক উৎপীড়ন কৰাৰ অভিযোগত আৰ পি এফ জোৱানক গ্ৰেপ্তাৰ

চলন্ত ৰে'লত এগৰাকী মহিলা যাত্ৰীক উৎপীড়ন কৰাৰ চেষ্টা কৰাৰ অভিযোগত ৰে'ল সুৰক্ষা বাহিনীৰ (আৰপিএফ) এজন জোৱানক গ্ৰেপ্তাৰ কৰিছে।

উল্লেখ্য় যে, অভিযুক্তজনক ওম প্ৰসাদ মীনা বুলি চিনাক্ত কৰা হৈছে।

জানিব পৰা মতে, কুখ্যাত আৰপিএফ জোৱানজনে ছোৱালীজনীক তাইৰ আসন বিচাৰি উলিওৱাত সহায় কৰাৰ অজুহাতত উৎপীড়ন কৰাৰ চেষ্টা কৰিছিল।

ছোৱালীজনীয়ে ৰেলৱে হেল্পলাইন নম্বৰত ফোন কৰাত সাম্ভাব্য বিপদৰ পৰা বাচিবলৈ সক্ষম হয়।

খবৰ অনুসৰি মহিলা যাত্ৰীগৰাকীয়ে ডিফু ৰে'ল ষ্টেচনত অৱধ অসম এক্সপ্ৰেছত উঠিছিল আৰু ডিফুত চৰকাৰী প্ৰতিযোগিতামূলক পৰীক্ষাত অৱতীৰ্ণ হোৱাৰ পিছত গুৱাহাটীলৈ যাত্ৰা কৰি আছিল বুলি সূত্ৰই জানিবলৈ দিয়ে।

ৰে'ল আৰক্ষীয়ে অভিযুক্ত জোৱানজনক অতি তৎপৰতাৰে গ্ৰেপ্তাৰ কৰে, অৱশ্যে, ভুক্তভোগীজনে এতিয়াও চৰকাৰী ৰে'লৱে পুলিচ ষ্টেচনত এজাহাৰ দাখিল কৰা নাই।

ইয়াৰ মাজতে, জোৱানজনে তেওঁৰ কথিত আচৰণৰ বাবে বিভাগীয় শাস্তিৰ সন্মুখীন হৈছে। তেওঁক চাকৰিৰ পৰা নিলম্বিত কৰা হৈছে বুলিও জিআৰপিয়ে জনায়।