ৰজনীকান্তক ৫১ তম দাদাচাহেব ফাল্কে বঁটা প্ৰদান

সোমবাৰে ৬৭ সংখ্যক ৰাষ্ট্ৰীয় চলচ্চিত্ৰ বঁটা প্ৰদান অনুষ্ঠানত দক্ষিণ তাৰকা ৰজনীকান্তক ভাৰতৰ সৰ্বোচ্চ চলচ্চিত্ৰ সন্মান ৫১ তম দাদাচাহেদ ফাল্কে প্ৰদান কৰা হয়। 

অভিনেতাজনে ভাৰতীয় চলচ্চিত্ৰলৈ তেওঁৰ উল্লেখযোগ্য অৱদানৰ বাবে উপ ৰাষ্ট্ৰপতি এম ভেংকায়া নাইডুৰ পৰা সন্মানীয় বঁটা লাভ কৰে।

দাদাচাহেদ ফাল্কে বঁটাৰে সন্মানিত হোৱাৰ পিছত, ৰজনীকান্তে বাছ কণ্ডাক্টৰৰ পৰা এজন প্ৰখ্যাত অভিনেতালৈ তেওঁৰ যাত্ৰাৰ কথা মনত পেলাই ছিল আৰু তেওঁৰ পুৰণি বন্ধুক ধন্যবাদ জনাইছিল যিয়ে তেওঁক চলচ্চিত্ৰ উদ্যোগত যোগদান কৰিবলৈ পৰামৰ্শ দিছিল।

এই সন্মানীয় অনুষ্ঠানটোত ৰজনীকান্তৰ সৈতে তেওঁৰ জোৱাই ধনুষ, জীয়ৰী ঐশ্বৰ্য আৰু পত্নী লতা উপস্থিত আছিল। অনুষ্ঠানটোত ধনুষে 'অসুৰণ' চলচ্চিত্ৰত অভিনয় কৰাৰ বাবে শ্ৰেষ্ঠ অভিনেতাৰ ৰাষ্ট্ৰীয় চলচ্চিত্ৰ বঁটা লাভ কৰে।

এই বছৰৰ আৰম্ভণিতে, গায়ক আশা ভোছলে আৰু শংকৰ মহাদেৱন, অভিনেতা মোহনলাল আৰু বিশ্বজিৎ চেটাৰ্জী আৰু চলচ্চিত্ৰ নিৰ্মাতা সুভাষ ঘাইৰ দ্বাৰা গঠিত জুৰীয়ে ৰজনীকান্তক এই সন্মানৰ বাবে বাছনি কৰিছিল।

সন্মানীয় দাদাচাহেব ফাল্কে বঁটা চলচ্চিত্ৰ কৃতিত্বৰ উৎকৃষ্টতাৰ বাবে প্ৰদান কৰা হয় আৰু ভাৰতীয় চলচ্চিত্ৰৰ সৰ্বোচ্চ সন্মান।