এইবাৰ ৰাজ্য চৰকাৰৰ চকু দীঘলীপুখুৰী পাৰৰ গছকেইডালৰ ওপৰত! উৰণ সেতুৰ নামত কটা যাব দুশ বছৰীয়া পুৰণি গছ....

আধুনিকতাৰ নামত, বাৰে বাৰে প্ৰকৃতিয়ে কিয় কষ্ট ভুগিব লগা হয়? কিয় মানুহ জাতিটোৰ ইচ্ছা আকাংশাৰ বলি হয় প্ৰকৃতি? গুৱাহাটী মহানগৰীৰ সেউজীয়াবোৰ যেন এতিয়া অতীত হ'ল, আপুনি বা মই ইচ্ছা কৰিও ঘূৰাই নাপাম সেই প্ৰকৃতিৰ মনোমোহা অনুভৱ। 

এইবাৰ ৰাজ্য চৰকাৰৰ চকু দীঘলীপুখুৰী পাৰৰ গছকেইডাল। উৰণ সেতুৰ নামত কটা হ’ব দীঘলীপুখুৰী পাৰৰ গছ। উৰণ সেতুৰ নামত কটা যাব দুশ বছৰীয়া পুৰণি গছ। বিনষ্ট হ’ব দীঘলীপুখুৰীৰ ঐতিহ্য আৰু সৌন্দৰ্য।

উল্লেখ্য যে, প্ৰায় ২৫ ডাল গছ কটাৰ বাবে দিয়া হৈছে চিহ্ন। সেই লৈ প্ৰকৃতিপ্ৰেমীৰ মাজত সৃষ্টি তীব্ৰ প্ৰতিক্ৰিয়া। ‘দীঘলীপুখুৰী বচাওক’ শীৰ্ষক অভিযান নাগৰিক সমাজৰ। বহু নিবনুৱাই কৰ্মসংস্থাপন হেৰুওৱাৰ আশংকা।

ৰিজাৰ্ভ বেঙ্কৰ কাষৰ পৰা নুনমাটিলৈ প্ৰায় ১০ কিলোমিটাৰ দৈৰ্ঘ্যজোৰা উৰণ সেতুৰ নিৰ্মাণৰ কাম ই্তিমধ্যে আৰম্ভ কৰিছে আৰু ইয়াৰ মাজতে উৰণ সেতুৰ নক্সাৰ পৰৱৰ্তন ঘটাই তৈয়বুল্লাহ পথক সামৰি লোৱাত দীঘলিপুখুৰীৰ ঐতিহ্য আৰু সৌন্দৰ্যক ক্ষতিগ্ৰস্ত কৰিব বুলি স্থানীয় জনসাধাৰণৰ লগতে গুৱাহাটীবাসী বিক্ষুদ্ধ হৈ পৰিছে৷ আজি কৰ্তৃপক্ষই দীঘলীপুখুৰীৰ দুয়োকাষৰ মহম্মদ তৈয়বুল্লাহ পথ আৰু সন্দিকৈ ছোৱালী মহাবিদ্যালয়ৰ সন্মূখৰ পথৰ প্ৰায় ২৫ ডাল গছ কটাৰ বাবে চিহ্নিত কৰি হালধীয়া ৰঙৰ ক্ৰছ চিহ্ন আকি দিছে আৰু ইয়াৰ ভিতৰত প্ৰায় দুশ বছৰীয়া গছো আছে বুলি অভিযোগ উত্থাপিত হৈছে৷