January
09
/ 2022
ঢেঁকীৰ গুমগুমনিত মুখৰিত ৰাজ্য। অসমীয়াৰ হেঁপাহৰ উৎসৱ ভোগালীলৈ মাজত মাত্ৰ কেইটামান দিন। পিঠা-পনা, লাড়ু, আখৈ, চিৰাৰে ভৰিছে গাঁও-ভূঁই, নগৰ-চহৰৰ বজাৰ সমাৰ। গাঁৱে-ভূঞে আখলত ব্যস্ত মহিলাসকল। উলহ-মালহেৰে হেঁপাহৰ উৎসৱক আদৰিবলৈ যো-জা চলিছে প্ৰতিজন খিলঞ্জীয়া অসমীয়াৰ ঘৰত।
মাঘ বিহুৰ দিনা বিভিন্ন সুস্বাদু খাদ্য সম্ভাৰেৰে এসাঁজ উদৰ পূৰাই খাব অসমীয়াই। কিয়নো ভোগালী মানেই ভোগৰ আনন্দ। কৃষিজীৱী অসমীয়াই বছৰৰ ফচল ভঁৰালত ভৰাই মাঘৰ বিহুত আনন্দৰে এসাঁজ খোৱাৰ আছে পুৰণিকলীয়া পৰম্পৰা। উৰুকাৰ নিশা লগে-ভাগে মিলি হাঁহে-মাহে ভোজ খোৱাৰ পিছতে বিহুৰ দিনা মেজিক সেৱা কৰি কোমল চাউল, চিৰা-দৈ, গুড়ৰ জুতি লয় অসমীয়াই।