গৰুখুঁটিত উচ্ছেদিত ভূমিত উত্তপ্ত পৰিস্থিতি, হাতত অস্ত্র লৈ আৰক্ষীক আক্রমণ...

৩ নং ঢলপুৰ এলেকাত উচ্ছেদ অভিযানৰ সময়ত দৰং জিলাৰ গৰুখুঁটিত উত্তপ্ত পৰিস্থিতি, যাৰ ফলত বেদখলকাৰীসকলে হিংসাত্মক প্ৰতিবাদ সাব্যস্ত কৰে।

প্ৰতিবাদকাৰীসকলে আৰক্ষী কৰ্মীসকলক চোঁকা অস্ত্ৰৰে আক্ৰমণ কৰিবলৈ চেষ্টা কৰে, যাৰফলত পিছত আৰক্ষীয়ে কন্দুৱা গেছ আৰু ৰবৰ বুলেট ব্যৱহাৰ কৰিব লগা হয়।

উচ্ছেদস্থলীত দুই সহস্ৰাধিক আমছু কৰ্মীৰ প্ৰতিবাদ, উচ্ছেদত বাধা প্ৰদান আমছুৰ।

প্ৰতিবাদকাৰীসকলক ছত্ৰভঙ্গ কৰিবলৈ আৰক্ষীয়ে শূন্যলৈ লক্ষ্য কৰি গুলীচালনা কৰিব লগা পৰিস্থিতি সংঘটিত হয়।

প্ৰতিবাদকাৰীসকলে শিলগুটিও নিক্ষেপ কৰে।

ঘটনাটোত কমেও দুজন প্ৰতিবাদকাৰী নিহত হয় আৰু তিনিজন আহত হয়। লগতে দুজন আৰক্ষীও আহত হয়।

পৰিস্থিতি এতিয়াও শান্ত নোহোৱাৰ বাবে আহতৰ সংখ্যা বৃদ্ধি হোৱাৰ সম্ভাৱনা আছে। পৰবৰ্তী সময়ত আৰু অধিক বিৱৰণলৈ অপেক্ষা কৰি থকা হৈছে।

ইয়াৰ পূৰ্বে সোমবাৰে ছিপাঝাৰ জিলা প্ৰশাসনে অবৈধ বেদখলকাৰীৰ পৰা ভূমি মুক্ত কৰিবলৈ ১ নং আৰু ৩ নং ঢলপুৰ অঞ্চলত এক বৃহৎ উচ্ছেদ অভিযান চলাইছিল।

প্ৰায় ৮,০০০ পৰিয়ালৰ দ্বাৰা বেদখল কৰা চৰকাৰী ভূমিৰ প্ৰায় ৪,৫০০ বিঘা অভিযানৰ সময়ত মুক্ত কৰা হৈছিল।