কেৱল মাত্ৰ খাদ্যৰ বাবেই কাজিয়া কৰি নিজ মাতৃক জ্বলাই দিলে পুত্ৰই........

মহাৰাষ্ট্ৰত সংঘটিত হৈছে এক অমানৱীয় ঘটনা। মহাৰাষ্ট্ৰৰ ৰায়গদ জিলাত খাদ্য ৰন্ধাৰ সময়ত খাদ্য ৰন্ধাক লৈ কাজিয়া লাগি নিজ পুত্ৰই জ্বলাই দিলে মাতৃক। ৰেৱদাণ্ডাৰ সমীপৰ নৱখাৰ গাঁৱত মঙলবাৰে সন্ধিয়া সংঘটিত হয় এই ঘটনাটো। এই অমানৱীয় ঘটনাৰ বলি হোৱা মাতৃ গৰাকীৰ নাম চাংগুনা নামদেও খোট বুলি জানিব পৰা গৈছে। জানিব পৰা মতে, মহিলাগৰাকীৰ বৃহস্পতিবাৰে পুৱাই আলিবাগৰ এখন চৰকাৰী চিকিৎসালয়ত এক যন্ত্ৰণাদায়ক মৃত্যু হয়।

উল্লেখ্য যে, তদন্তকাৰী আৰক্ষী বিষয়াই জনোৱা অনুসৰি যোৱা মঙলবাৰে মাতৃ আৰু পুত্ৰৰ মাজত খাদ্য প্ৰস্তুতকৰণ আৰু পৰিৱেশন লৈ কাজিয়াৰ সৃষ্টি হৈছিল। তাৰ পিছতেই পুত্ৰ জয়েশে ক্ষোভত মাকক ঘৰৰ সন্মুখৰ মুকলি ঠাইলৈ টানি লৈ গৈ শুকান খৰি সংগ্ৰহ কৰি জুই লগাই দিয়াৰ অভিযোগ উত্থাপন হৈছে।

ঘটনা সন্দৰ্ভত তথ্য লাভ কৰাৰ পিছত ৰাৱদাণ্ডা থানাৰ বিষয়াসকলে ততাতৈয়াকৈ সেই স্থানত উপস্থিত হৈ আহত মহিলাগৰাকীক চিকিৎসালয়লৈ লৈ যায় বুলিও তেওঁ জানিবলৈ দিয়ে।

উল্লেখ্য যে, আৰক্ষীৰ এটা দলে ওচৰৰ হাবি এখনৰ পৰা ২৬ বছৰীয়া জয়েশক গ্ৰেপ্তাৰ কৰে। সমগ্ৰ ঘটনা সন্দৰ্ভত বৰ্তমানেও তদন্ত অব্যাহত আছে।