আচৰিত! স্বামী আৰু শাহুৱে মিলি হত্যা কৰি ঘৰৰ ভিতৰত ওলমাই থ'লে বোৱাৰীক..

নুমলীগড়ৰ মৰঙিৰ পাটকটীয়া গাৱঁত উত্তপ্ত পৰিস্থিতি ৷ এগৰাকী বোৱাৰীৰ মৃত্যুক কেন্দ্ৰ কৰি এই পৰিস্থিতি ৷

শুকুৰবাৰে নিশা বৈষ্ণৱী দাস বৰা নামৰ বোৱাৰী গৰাকীক স্বামী মুনীন বৰা আৰু শাহুৱেকে হত্যা কৰি ঘৰৰ ভিতৰত ওলমাই থোৱাৰ অভিযোগ বৈষ্ণৱীৰ পৰিয়ালৰ ৷

ইতিমধ্যে নুমলীগড় আৰক্ষীয়ে নিশাই মৃতদেহ উদ্ধাৰ কৰি গোলাঘাটৰ কুশল কোঁৱৰ অসামৰিক চিকিৎসালয়ত মৰণোত্তৰ পৰীক্ষাৰ অন্তত শনিবাৰে পৰিয়ালৰ লোকক চমজাই দিয়ে ৷

বোৱাৰী গৰাকীৰ মেৰাপানীৰ পৰিয়ালসহ ৰাইজ আহি স্বামীগৃহৰ ভিতৰতে সৎকাৰ কৰাৰ ব্যবস্থা কৰাত এক উত্তপ্ত পৰিস্থিতিৰ সৃষ্টি হয় ৷ আৰক্ষীৰ হস্তক্ষেপত ঘৰৰ ভিতৰৰ পৰিবৰ্তে চোতালতে সৎকাৰ কৰাৰ ব্যবস্থা কৰে ৷ আনহাতে স্বামী গৃহৰ পাটকটীয়া গাৱঁৰ কোনো লোকে সৎকাৰ কৰিবলৈ আগবাঢ়ি নহাত মেৰাপানীৰ মাতৃ পৰিয়াল তথা ৰাইজৰ মাজত এক উত্তেজনাপূৰ্ণ পৰিস্থিতিৰো সৃষ্টি হয় ৷

অৱশেষত মেৰাপানীৰ পৰা অহা বোৱাৰী গৰাকীৰ পৰিয়ালসহ ৰাইজে স্বামী মুনীন বৰাৰ ঘৰৰ সন্মুখৰ চোতালতে মৃত বৈষ্ণৱীক দাহ কৰে ৷ ইয়াকে লৈ সমগ্ৰ নুমলীগড়ত চাঞ্চল্যৰ সৃষ্টি হৈছে ৷ ইতিমধ্যে শনিবাৰে নিশাই অভিযুক্ত স্বামী মুনীন বৰা আৰু শাহুৱেকক নুমলীগড় আৰক্ষীয়ে আটক কৰি তদন্ত অব্যাহত ৰাখিছে ৷